المساعد الشخصي الرقمي

مشاهدة النسخة كاملة : محاورة بين الشاعر / عيد الذيابي والشاعر / كرباج العصيمي


نظام ساهر
15-12-2012, 09:10 AM
عيد الذيابي //

سلام الله سلامن يضرب الرجال بالرجال

اله وقفه ويعرف مدخله من قبل مخراجه

ياكرباج العصيمي منت فالدعوه قصير حبال

تسمع للسلام اللي يعرف أنك من أنتاجه


كرباج العصيمي//


الا يامرحبا ترحيبة العقال بالجهال

وكرباج العصيمي ناشرن من فوقكم باجه

الا يامصعب المخراج الا يامسهل المدخال

ياكم راسن يجينا بتاج يرجع فاقدن تاجه


عيد الذيابي//


يدوم ابك البقا والجيل يطلع من بعده اجيال

وباجه ياصغير العقل لك وايديك محتاجه

ياكرباج العصيمي ربك اللي يحسن الاحوال

ياكم رجلً يخاصمني ويسري كاسر سراجه


كرباج العصيمي//


ياطيبك الذيابي مار لاقالو على ماقال

تهرج وانتبه والناس نقاده وهراجه

ليا منك وردت العد دور لك حبال طوال

ترى منهو قصر حبله ضماه يرافق احراجه


عيد الذيابي//


الا لاهنت ياللي تعرف النزال والرحال

أنا ماهمني لو البحر هاجت به أمواجه

ليا مني وردت العد زان الحال قبل الفال

واقول اللي قصير حبال محدن دوم يحتاجه


كرباج العصيمي//


تقوله مار لو ان الاصيله حصلت خيال

ماراحت فآخر المضمار عقب السبق دراجه

حدى الثنيتن ؟ ياهي الخباله او فيك اهبال

اعوبل فيك؟ واحساسك مبلد وسط ثلاجه


عيد الذيابي//


تقوله وانت منت براعي المهره ولا جمال

ولو انك تجي وتروح ماتقضي ولا حاجه

انا مافيني الا الصحوه اللي تطرد الانذال

أحوبر فيك؟ وانت تنادي حريسان بأفواجه


كرباج العصيمي//


الا يامال فرقا العين يابن فهيد ياهذال

اثرك الفارس اللي قبل الله رسمة حجاجه

ابا اقهويك وانته راعي الصحوه كذا فنجال

ترى كرباج لا هالحين؟؟ حاشم عنك كرباجه



عيد الذيابي//


الا ياللي نثرت الدمع قبلك مات ابن هلال

وأثرك اللي يحوص ومختلف دربه ومنهاجه

ترى من يكثر بشرب القهاوي صايبه سلال

وكرباجك ياليت تلفه وتدخله للصاجه

محاووووووووووورة من أرض المملكة العربية السعودية جداااااااا روووووووعه
((وكرباجك ياليت تلفه وتدخله للصاجه))هههههههههههه

سهيل العتيبي
15-12-2012, 09:23 AM
صح لسان الشاعرين
محاوره نارية وقوية جدا
ولكن سؤال :
هذان الشاعران معروفان للجميع
ام انهم على مستوى المنطقة ؟

محاورة جميلة شوهت صراحة بآخر شطر من آخر بيت
غير لائق صراحه !
شكرا على إدراج المحاورة ياساهر ولا هنت .

نظام ساهر
15-12-2012, 09:56 AM
شكرااا على مروورك والشاعران معروفان لكن غير أعلاميا ورد الشاعر الأخير أعتقد ان رده حامي ولاترك للشاعر الثاني مجال يرد عليه وهذا سبب من أسباب المحاوره لابد أن يجي فيها سب وشتم واكثر الشعار أعتزلو من المحاورات بسبب هذا السب

سفير العصمه
15-12-2012, 01:04 PM
صح الله لسانهم و المحاوره فن رائع ومن يستغله

لايصال الرساله فنجح و اما من يستغله للشتم

فلا يستحق ان يكون شاعر والشتم دائما عذر الضعيف

و تقبل مروري

الأمير الفارس
15-12-2012, 09:52 PM
محاوره رائعه لاهنت

والله يعطيكـ العافيه يا

ساهر





شكراً لكـ

تحياتي

شمس الغروب
16-12-2012, 11:53 PM
صحت الالسنه ولاهنت
على المشاركه